1.
அது ஒன்றும்
பிரதான பிழையில்லை
எளிதினும் எளிய மறுப்புதான்.
புதிய ஆடையின் அழகு காட்டுவாய்
மாற்றிய தோடுகளை
சிமிட்டலில் நடனங்கொள்ளச்
செய்வாய்
பிடித்த பாடலின்
வரிகளை முழுகி
பிடித்த வரிகளை கேட்பதென
கேட்காத
எதிர்பாராத கணங்களில்
தானாக தோன்றி
சைகையில்
மொழியில்
தித்திப்பு மழையை பெய்விப்பாய்.
வெட்கை மிகுந்த இரவு
தாகம் உடலை
வறண்டு போகச் செய்தது
உன் பார்வையின் சொட்டுகள்
நதியாகி குளிர்விக்கும்
வறண்ட ரோகம்
இறக்கைகளாகி
பறத்தலில் வானை எட்டச் செய்யும்
எனவேதான் மன்றாடினேன்
நிமிடநேர வீடியோ அழைப்பிற்காக.
உன் மறுப்பின் காரணமறியாது
விழித்திருந்த இரவின் வெப்பம் பொசுக்கிய
நெகிழியானேன்.
2.
மண்பானை அடைகாக்கும்
நீரின் குளிர்ச்சி.
ஓடையின் மணலில் படிந்த
ஓடிய நீர்த்தடம்
மலை உச்சியில் அமர
கனியச் செய்யும் காற்று
பேருந்தில் அழைத்ததும்
மடி அமரும் குழந்தை
இருக்கையில் இணையாக
வந்தமரும் புதியவள்
தேநீரில் மிதக்கும்
டிக்காசன் நிலவு
துளிர்ப்பின் முண்டுதலில் வெடிப்புறும் நிலம்
இன்னும் இன்னுமென
நீளும் அலைவுகளை
உருவாக்கியபடியே இருக்கிறது
அணைப்பில் பிறக்கும்
ஒற்றை முத்தம்
*
