சக்தி கவிதைகள்

1. நதியின் கண்ணீர்

“நதி ஓடவில்லை
நகர்ந்தது.
கருப்பாய், கனமாய்,
நுரையை வாந்தி எடுத்தபடி.

கரையில் நின்ற
கிழவி சொன்னாள் –
“இது நதி இல்லை,
நாம் ஊற்றிய
சாயத்தின் சவ ஊர்வலம்.”

மீன்கள் செத்து மேலே மிதந்த போது தான் தெரிந்தது
தண்ணீரும் சாகும் என்று”

2. மரங்கள் பேசும்

என்னை வெட்ட
வந்தவனிடம்
நான் கேட்டேன் –
“உனக்கு நிழல் வேண்டாமா?”

அவன் சொன்னான் –
“நிழல் வேண்டும்,
மரம் தான் வேண்டாம்.”

நான் விழுந்தேன்.
என்னுடன் சேர்ந்து
நூறு கூடுகளும்,
ஆயிரம் பாடல்களும் விழுந்தன,

3. காதல்

அவள் அழகை
சினிமா போல் வர்ணிக்காதே

அவள் கண்களில்
சேரியின் தீ இருக்கிறது
அவள் கூந்தலில்
உழைப்பின் மண் இருக்கிறது
அவள் உடலில்
அடிமைப்படாத வனப்பு இருக்கிறது

அவள் என்னைக் காதலிக்கிறாள்
அதைவிட
என்ன அழகு வேண்டும்
இந்த உலகில்?,

4. சிட்டுகளின் வாழ்க்கை

எங்கே போனாய் சிட்டே?
செல்போன் டவரில்
சிக்கிக்கொண்டதா உன் சிறகு?
நகரம் முழுக்க தேடுகிறேன்,
ஒரு சத்தம் கூட இல்லை.
திரும்பி வா,
உனக்காக கொஞ்சம்
நெல்லை சேர்த்து வைத்திருக்கிறேன் நெஞ்சுக்குழிக்குள் கொஞ்சம்,

5. உழைப்பு சுரண்டல்

பகலில் ஊரில் வேலை
இரவில் சேரியில் கதை
அப்பா சொல்வார்
நாம் எப்படி ஏமாற்றப்பட்டோம் என்று
நான் கேட்டுக் கொண்டே
தூங்குவேன் ஏமாறாமல் இருக்க.

6. பறை மோளம்

பறையை
துக்கத்துக்கு மட்டும் அடிக்காதே

மகிழ்ச்சிக்கு அடி
போராட்டத்துக்கு அடி
எழுச்சிக்கு அடி
அடி அடி
சாதியின்
ஆணிவேர் எரியும் வரை அடி,

7. தண்ணீர் குடம்

ஒரு ஊர் வேண்டும்
தெருவுக்கு பெயர் இருக்கக் கூடாது
சுவரில் சாதி பெயர் இருக்கக் கூடாது
குடத்தில் சாதி இருக்கக் கூடாது

அங்கே
மனிதர்கள் மட்டும் இருக்க வேண்டும்
தண்ணீர் கேட்டால்
தண்ணீர் மட்டும் கொடுக்கும்
மனிதர்கள்
அவர்கள் இருக்க வேண்டும்,

8. அதிகாரம்

என் கை ரேகையில்
உழைப்பு இருக்கிறது,
மலம் அள்ளிய தழும்பு இருக்கிறது,
செருப்பு தைத்த காயம் இருக்கிறது.
இனி அதே கையில்
அதிகாரத்தின் மை இருக்கும்.